Մարքեթինգի, ինֆլյուենսերների և երևակայության մասին. Wnews.am-ի հերոսուհին Լիլիթ Մաթևոսյանն է (Photo)

Wnews.am-ի հերոսուհիները  նոր ժամանակների կանայք են՝ ինքնատիպ,  հաջողակ, ինքնավստահ  ու ոճային:  Լիլիթ Մաթևոսյանը Philip Morris-ի մարքեթինգի թիմի ղեկավարն է, Women Talks նախագծի հիմնադիրը:  15 տարի զբաղվում է մարքեթինգով:  Երևանի լավագույն, երիտասարդ  մարքեթոլոգներից մեկը  նաև երիտասարդ մայրիկ է՝ սուպեր նորաձև սանրվածքով և գեղեցիկ ժպիտով: Մի խոսքով՝ իսկական նոր սերնդի աղջիկ: Լիլիթի հետ զրուցել ենք ամենապահանջված  մասնագիտություններից մեկի՝ մարքեթինգի մասին: Զրույցը օգտակար կլինի Wnews.am ընթերցող բազմաթիվ գործարար կանանց, սթարթափերների , ինչպես նաև մոտիվացիա՝ հաջողության ձգտող երիտասարդ աղջիկների համար:

Լիլիթ . եթե տարիներ առաջ մարքեթինգին լուրջ չէին վերաբերում, ապա հիմա այն ամենապահանջված մասնագիտություններից է, ինչո՞վ է դա պայմանավորված: 

-Մարքեթինգի նկատմամբ պահանջարկը բխում է մրցակցությունից և մրցակցային դիրքերը պահպանելու, ամրապնդելու պահանջից, բայց մինչ մրցակցությանն անցնելը, արդի է նաև շուկան արդյունավետ վերլուծելու պահանջը: Մի լավ օրինակ կա. մարքեթոլոգներին ուղարկում են Ավստրալիա՝ պապուասների մոտ, որպեսզի շուկայի վերլուծություն անեն՝ կոշիկ ներմուծելու համար, մի մարքեթոլոգն ասում է․ «Ամեն ինչ շատ վատ է, այնտեղ ոչ մեկ կոշիկ չի հագնում» ու հետ է գնում, մյուսն ասում է. «Ամեն ինչ շատ լավ է, այստեղ դեռ ոչ ոք կոշիկ չի հագնում: Հիանալի հնարավորություն է»: Մարքեթինգը մի կողմից քո արտադրանքն առաջարկելն է՝ արդեն գոյություն ունեցող պահանջարկը բավարարելու համար, բայց լավագույն մարքեթինգը նոր պահանջմունքի ձևավորումն է ՝նոր ապրանքի շուկայահանմամբ: Սթիվ Ջոբսն առաջարկեց ամենը մեկում հեռախոս, որի պահանջարկը չկար, բայց նա առաջ անցավ ժամանակից և ստեղծեց կենսունակ պահանջարկ:  Ենթադրենք պահանջարկը առաջացավ ու մեկ այլ ընկերություն էլ սկսեց նույն ապրանքն արտադրել, այստեղ արդեն սկսվում է մրցակցությունը, ավելի է մեծանում մարքեթինգի պահանջը, սկսվում է խաղ էմոցիաների վրա, առաջանում են բրենդեր, որոնք սկսում են ասոցացվել մեր ցանկությունների ու երազանքների հետ։

-Մեծ կորպորացիաների ղեկավարները, գործարարները  հեշտությա՞մբ են վստահում մարքեթոլոգին, հատկապես , երբ նա երիտասարդ աղջիկ է: 

-Վստահության հետ կապված խնդիրներ լինում են, հատկապես, երբ կրեատիվ ու ոչ ստանդարտ  ես մտածում, առաջարկում ես անսովոր լուծումներ, ոմանք միանգամից չեն ընկալում հավանական արդյունքը: Իրականում իմ առաջին լուրջ հաջողությունը եղել է, երբ չլսեցի ոչ մեկի,  ու չնայած ձախողում մատնանշող զանազան ակնարկների, ես իրականացրեցի իմ մտածած ոչ ստանդարտ արշավը և գրանցեցինք մեր ընկերության պատմության մեջ լավագույն քեյսերից մեկը ամբողջ տարածաշրջանի համար՝ վաճառքների ծավալները վեց ամսվա մեջ 300 տոկոսով գերազանցեցին լավագույն արդյունքը։ Գաղտնիքը նրանում էր, որ ինքս վստահ էի իմ որոշման մեջ, խորապես ուսումնասիրել էի հաճախորդիս ճանապարհը, նախասիրությունները, ասոցիացիաները, գիտեի, թե ինչից կուրախանա ու ինչից կհուզվի․․․ մի խոսքով վերլուծելով այս ամենը՝ գտել էի օրվա, շաբաթվա, ամսվա կտրվածքով լավագույն լուծումը, որն անընդհատ նրան կհիշացնի մեր բրենդի մասին, կհետաքրքրի ու կդրդի նրան բրենդի հետ երկարատև ընկերության: Ամենակարևորը ճիշտ թիրախային լսարան ընտրելն է, հասկանալը՝ ինչ արժեքներ, աշխահայացք, ինչ վարքագիծ ունի քո լսարանը, և ասելիքդ նրան հասկանալի լեզվով ու ձևով հասցնելն է:

-Ինչպե՞ս դառնալ լավագույն, վստահելի բրենդը հաճախորդի համար, ինչպե՞ս ընկերություն անել նրա հետ :

-Կարևոր է բրենդին ներարկել հստակ բնավորություն ու հարստացնել էմոցիաներով, որոնց միջոցով օտար բրենդը ցանկալի ու մտերիմ կդառնա հաճախորդի համար։ Բրենդի դիրքավորումը տեղի է ունենում ոչ թե շուկայում, այլ թիրախային հաճախորդի ուղեղում: Այնուհետև բրենդը կտա ցանկալի խոստումներ և դրանք կպահի իր որակակական հատկանիշներով, կայուն բնավորությամբ, ոճով, հաղորդակցման կոնտենտով, ինովացիաներով, ի վերջո հասնելով նրան, որ հաճախորդը իրեն զգա որպես քո բրենդի ամենացանկալի, երանելի հաճախորդը, որ մեկընդմիշտ մնա քո լոյալ ընկերը։ Հասանք նեյրոմարքեթինգին, որն այսօր մարքեթինգում ամենաթրենդային ուղղություններից է, որի միջոցով ամուր անձնական կապ է ստեղծվում հաճախորդի հետ, դրա լավագույն օրինակներից է Pandora-ն իր թևնոցներով ու չարմերով՝ ասոցացվելով կնոջ հաջողությունների, հաղթանակների, գաղտնիքների, կյանքի կարևորագույն պահերի ու ձեռքբերումների հետ: Այս ուղղության հաջողության հիմքում ընկած է մարդու անհատականացման պահանջմունքը։

-Հիմա շատ է խոսվում  ինֆլյուենսեր մարքեթինգի մասին, ի՞նչ է դա:

-Հաջորդ թրենդային ուղղությունը ինֆլյուենսեր մարքեթինգն է, երբ հաճախորդը, դառնալով բրենդի ընկերը, սկսում է իր շրջապատին ընկերացնել սիրելի բրենդի հետ: Այս ուղղությունը ի հայտ է եկել դեռևս 20րդ դարի սկզբներից, երբ բրենդերը սկսեցին ստեղծել պերսոնաներ՝ էմոցիաների միջոցով ազդելու համար գնման որոշման վրա։ Պատմության մեջ այս ուղղության ամենահայտնի կերպարը Սանտա Կլաուսն է` սպիտակ մորուքով բարի պապիկը, որը ստեղծվել է Կոկա Կոլայի կողմից և այսօր վերածվել իր մեջ մի մեծ տոն կրող շատ սիրված կերպարի։ Այն ժամանակ նման  կերպարներին ինֆլյուենսեր չէին անվանում։ Այս ուղղության երկրորդ փուլը սելեբրիթի-ինֆլյունսերների մասին էր – շատ բրենդերի առկայությունը դժվարեցնում էր գնորդների ընտրությունը և մտածված կերպարները բավարար չէին։ Սելեբրիթիներն արդեն վայելում էին զանգվածային համակրանք և «վաճառում» էին իրենց անունն ու համբավը բրենդերին։ Ինֆլյունսեր մարքեթինգն այսօր «հաճախորդակենտրոն» մարքեթինգի կարևոր էլեմենտ է։ Այսօր սպառողները գերադասում են լսել վստահելի մարդու կարծիքը, մարդու, ով կոմպետենտ է և էքսպերտային կարծիք կարող է հայտնել։ Ի տարբերություն սելեբրիթիների, ինֆլյուենսերներն այսօր ընկալվում և ընդունվում են իրենց անհատական կոնտենտով, լինի դա ճամփորդություն, առողջ սնունդ, նորաձևություն և այլն։ Եթե սելեբրիթիները գովազդի կրող էին, ապա այսօրվա ինֆյուենսերները կոնտենտ ստեղծող են, ունեն իրենց կարծիքը և վայելում են որոշակիորեն էքսպերտային համբավ իրենց շրջապատում։ Այս տեսանկյունից նրանք բրենդերին «վաճառում են» սոցիալական ցանցերում իրենց կոնտենտն ու լսարանի ներգրավվածությունը։ Այսօր ինֆլյուենսերների թեման ամենաքննարկվողն է, բայց, ինպես տեսանք, այն նոր չի առաջացել, և եթե կասկածում եք օգտվել այս ուղղությունից թե ոչ, ես խորհուրդ կտամ փորձել, մի կողմից որպես մարքեթոլոգ դուրս կգաք ձեր կոմֆորտ զոնայից, մյուս կողմից շատ հետաքրքիր փորձ ձեռք կբերեք, չէ՞ որ այլևս հստակ բանաձևեր չկան հաջողության հասնելու։

-Մարքեթինգը քեզ կյանքում, մարդկանց հետ շփման մեջ օգնո՞ւմ է: 

-Մարքեթինգը դադարել է ինձ համար մասնագիտություն լինել,  դա ուղղակի իմ ապրելակերպն  է: Մարքեթոլոգի աշխատանքը չի ավարտվում աշխատասենյակից դուրս գալով: Ամենահիանալի մտքերը առաջանում են անսպասելի՝  գիշերը քնելուց առաջ, ֆիլմ նայելիս,  սրճարանում ընկերների հետ զրուցելիս, զբոսնելիս: Ես միշտ փորձում եմ բաց չթողնել այդ թանկարժեք իդեաները և հենց տեղում ձայնագրում եմ կամ նշումներ անում հեռախոսում։ Մարքեթոլոգի համար  շատ կարևոր է երևակայությունը, ես ունեմ փոքրիկ բալիկ, իսկ երեխաների մոտ երևակայելը շատ բնական է ստացվում, ես իր հետ մանկանում եմ, ընկնում եմ երևակայության գիրկը: Դա տոնուսի մեջ է պահում, թույլ է տալիս ինքս ինձ պատկերացնել ցանկացած կերպարում և իմ իդեաները այդ կերպարի վրա փորձարկել:

-Կնշե՞ս 3 անտիթրենդ մարքեթինգում: Ի՞նչ չպետք է երբեք անի լավ մարքեթոլոգը: 

1.Բոլոր պոպուլյար տրենդերին հետևելը – այսպես յուրահատկությունն ու փայլուն գաղափարները կորցնելու վտանգ է առաջանում։ Բացի այդ, եթե դիտարկում ես թրենդի օգտագործումը որպես նոր միջոց, ապա արդեն բաց ես թողել առաջինը լինելու հնարավորությունը

2.Մինիմալիզմը որպես հիմք ընդունելը բրենդի կայացման սկզբում – մտածեք հազարավոր start-up ընկերությունների մասին, որոնք կրկնօրինակում են Apple-ին։ Կա համոզմունք, որ նորը լավ մոռացված հինն է, բայց ոչ մի նշանակալի հիացմունք չկա Apple-ի բրենդի ստվերում գործող բազմաքանակ ընկերությունների մասին։ Մինիմալիզմը նկարագրական է մեծ բրենդերին, որոնք դա վաստակում են տարիների ընթացքում իրենց հաճախորդների հետ մտերմության արդյունքում – երեք թեք գծերը ասոցացնում ենք Adidas-ի հետ։ «Լավագույն լոգոները ամենապարզ լոգոներն են» ասացվածքը ավելի շատ միֆ է․ ցանկացած պարզ լոգո նախկինում բավականին բարդ կառուցվածք է ունեցել, շատ դեպքերում կրել է նաև ընկերության անվանունը։ Միայն դրանց միջև և հաճախորդի ուղեղում ամուր կապ ստեղծելուց հետո կարելի է անցնել մինիմալիզմին։

3.Կանոնները խախտելու կամ շրջանցելու մոլուցք – շատ հաճախ լսում ենք՝ պետք է անտեսել կանոնները առաջ անցնելու համար։ Հետաքրքիր մոտեցում է, բայց ամենանորարարական մոտեցումը կարող է լինել ընտրել որոշակի կանոններ և մշտապես դրանց հավատարիմ մնալը: Լավ կանոնները լավն են հենց նրանով, որ կիրառական դաշտում արդյունավետ են։ Այս հատկանիշով են «թրենդային» ընկերությունները տարբերվում կայացած ընկերություններից։

Վերջում ամփոփեմ մեծ գաղափների կարևորությամբ։ Բրենդերի համար միայնակ գոյատևելը դարձել է գրեթե անհնար։ Եթե նախկինում բրենդերն էին համախմբում մարդկանց, հիմա դա անում են գաղափարները՝ ինչպիսիք են օրինակ առողջ ապրելակերպը, շրջակա միջավայրի մաքրությունը, որոնց շուրջ հավաքվում են բրենդերը և սպառողների հոծ բազմություններ։ Այս մոտեցումն օգնում է բրենդերին ավելի ամուր և արդյունավետ դիրքավորվել իրենց հաճախորդի մտքերում։

-Խոսենք նաև Women Talks-ի մասին, որպես կանանց մասին կայք այս թեման մեզ շատ հետաքրքիր է: 

-Կանայք շատ զբաղված են,  ունեն աշխատանք, ընտանիք, ընկերներ ու ներքուստ բոլորի համար պատասխանատվություն են զգում, անընդհատ մտածում են նրանց մասին,  հոգատարության են դրսևորում և հաճախ իրենց մասին մոռանում են, իրենց  համար ժամանակ չեն ունենում: Դրա ապացույցն է ինտերնետային որոշ տենդեր՝ դեմքի յոգա երիտասարդ տեսք ունենալու համար, մարմնամարզությունների կուրսեր, արա ինքդ, հաջողակ մարդկանց սովույթները, համեղ բայց օգտակար և այլն։ Տրենդերից եզրակացություններ անելով՝ ստեղծեցինք Women Talks նախագիծը, որն իմ ամենասիրելի նախագիծքն է։ Women Talks-ի ժամանակ հանդիպում են կանայք,  զրուցում են իրենց համար կարևոր թեմաներից, կիսվում են փորձով ու բարենպաստ մթնոլորտ է ստեղծվում նոր ծանոթությունների համար, նոր համագործակցությւոնների համար:  Յուրաքանչյուր հաջողակ մարդ ուզում է շփվել այլ հաջողակ մարդու հետ, նեթվորքինգը շատ կարևոր է  ու մենք փաստորեն այդ կանանց կապող միջոցն ենք ու մեր հյուրերը էմոցիոնալ կապվում են  նաև մեզ հետ:

-Եթե մի կողմ թողնենք մարքեթինգը, էլ ինչո՞վ է քո կյանքը լցված:

-Հաճախակի ճանապարհորդություններով , համեղ ուտեստներով.  շատ եմ սիրուն նոր համեր փորձել, դա իմ ամենասիրելի հոբբին է: Կյանքս լի է նաև ձեռագործ զարդերով ու կոշիկներով: Կոշիկների նկատմամբ յուրահատուկ թուլություն ունեմ, նաև՝ մուլտֆիլմերով և ջազով:


Զրուցեց  Գայանե Շահինյանը

Հագուստը՝  Petoor

Լուսանկարիչ Մարատ Կարապետյան

 

ՁԵԶ ԿՀԵՏԱՔՐՔՐԻ ՆԱԵՎ

Մեկնաբանություններ

Loading Facebook Comments ...